Lea-Artibai eta Mutriku

2009-06-30 | 19:01:09

Abuztuko oporretan konponduko dute Atxondo kiroldegiko igerilekua

Igerilekuko makineria guztia aldatuko dute eta harotzeria berriztu.

Urtero legez, mantentze lanak egiteko, abuztuan itxita egongo da Atxondo kiroldegia, baina aurten behar horiek egiteagaz gainera, kiroldegian hobetze lanak egiteko aprobetxatuko dute epe hori.
Igerilekuak urte asko dituela eta bere makineria guztia aldatuko dute, eta eraikineko harotzeria guztia berriztu, leihoak eta ateak besteak beste. Horretaz gainera, margotu egingo dute. Barruko instalazioak hobetzeagaz gainera, aukera zabalduko dute kanpoan eraikiko duten igerileku txiki batekin. Hala ere, igerileku berriko lanak ez dira hasiko irailera arte.

Ez du erantzunik

2009-06-25 | 16:46:50

Markina-Xemeingo Udaleko taldeek aho batez salatu dute erasoa

Udalak ez du, momentuz, ezelako mobilizazio deirik iragarri atzo herriko emakume batek jasandako erasoa salatzeko.

Markina-Xemeingo udalbatza osatzen duten EAJ, Aralar eta hautetsi independentistek, aho batez, gaitzetsi dute «emakumeenganako edozein eraso, tratu txar edo irain matxista». Atzo, hilak 24, herriko andra batek bere bikotekide ohiarengandik jasandako erasoaren harira batu dira gaur goizean Udaleko talde guztiak, eta eurekin batera Markina-Xemeingo Gaittun emakumeen taldeko ordezkariak ere. 
Udalak ez du, momentuz, ezelako mobilizazio deirik iragarri. Horren ordez, herritar guztiei adierazpen bat zabaldu die ohar bidez. Bertan, eraso matxistak gaitzesteagaz batera, Udalak berbaz berba dio «emakumeen aurkako edozein biolentzia mota edo portaera biolentoak eragin edo bultzatzen dituztenek ez dutela lekurik gure gizartean». 
Era berean, Udalaren laguntza eta bitartekaritza eskaini dio herenegun jipoia jasan zuen emakumeari: «Elkartasun zintzoena eta babes osoa adierazi nahi diogu tratu txarrak salatu dituen herritarrari». 

Erantzun 1

2009-06-24 | 15:23:26

Bere emazteari tratu txarrak eragiteagatik gaur goizean atxilotutako gizona aske utzi dute

Arratsaldean pasatu da epailaeren aurretik eta aldez aurreko salaketarik ez zuenez aske utzi du epaileak

Ertzaintzako agenteek 59 urteko gizonezko bat atxilotu dute gaur goizaldean bere emazteari tratu txar fisiko eta psikologikoak eragin eta heriotza mehatxuak egin izana leporatuta. Goizaldeko ordu bata eta erdiak aldera Markinako bizilagun batek Ertzaintzari deitu dio mozkortuta zegoen gizonezko bat istiluak sortzen zebilela ohartarazteko. Herrizaingo Sailak jakitera eman duenez, jipoia jaso ondoren, istilu egilearen emaztea, beste etxe batean ezkutatu zen, eta hara joan zen gizonezkoa. Emakumezkoaren ubeldura eta kolpeak egiaztatu dituzte ertzainek eta ustezko erasotzailea atxilotu egin dute genero indarkeria delitua leporatuta. Goiz osoa komisaldegian pasatu ostean, Gernikako epaitegira eroan dute eguerdian. Bertan epaia hartu ondoren aske utzi du epaileak gizonezkoa bi baldintzapean: hilabetero Markina-Xemeingo Bake Epaitegian azaldu beharko du eta emaztearengandik 300 metroko gehiegizko distantzia mantendu beharko du. Markina-Xemeingo Udalak bere laguntasun osoa eskaini dio emakumeari eta bere familiari eta bihar Udala osotzen duten hiru alderdiak batu egingo dira adostutako salaketa bat egiteko.

5 erantzun

2009-06-18 | 16:45:02

Neska-mutilak izango dira etzi triatloiko protagonista

Estraineko, Triatloi txikia egingo da domeka goizean Atxondo kiroldegian eta bidegorrian.

Igerian egin, bizikletari pedalkadak eman eta aringa-aringa ibiliko dira domekan 7 eta 12 urte bitarteko neska-mutilak Atxondo kiroldegian eta bidegorrian. Helburua triatloia sustatu eta gaztexoen artean ezagutzera ematea da, eta beraz, norberak probatzea ezagutzeko modurik onena dela eta, I. Triatloi Txiki antolatu dute Alarabi Triatloi Taldeak eta Atxondo Igeri Taldeak. Parte-hartzaileak kategoria desberdinetan banatuta egongo dira adinaren arabera: 7 eta 8 urte, 9 eta 10 urte eta 11 eta 12 urte, eta distantzia desberdinak egin beharko dituzte. Halan, 7, 8, 9 eta 10 urteko umeek 50 metro igeri, 600 metro bizikletan eta 350 metro aringa-aringa egin beharko dituzte. 11 eta 12 urtekoek, ostera, 75 m igeri, 1.200 m bizikletan eta 350 m aringa-aringa. Proba 10:00etan hasiko da.

Ez du erantzunik

2009-06-15 | 10:45:15

"Amaraunen alamandrea" lan berria aurkeztu dute Yolanda Arrieta eta Leire Urbeltzek

Goizean aurkeztu dute idazle eta ilustratzaileak elkarlanean egin duten lana aurkezpen berezi batekin

Yolanda Arrieta Etxebarriko idazleak eta Leire Urbeltz ilustratzaileak "Amaraunen alamandrea" lan berria aurkeztu dute gaur goizean Kontsejupean. Aurkezpenean, liburuan bezala, irudia eta hitza uztartu dituzte. Egileez gain, Araitz Urbeltz eszenografo eta aktoresak eta eskoletako umeek ere parte-hartu dute.

Ez du erantzunik

2009-06-13 | 20:50:04

Zazpi lagun zauritu dira bost ibilgailuren arteko istripuan

Trabakuatik Markina-Xemeinera bidean gertatu da ezbeharra

Zazpi lagun zauritu dira gaur eguerdian bost ibilgailuren arteko istripuan, Trabakuatik Markina-Xemeinera bidean, tunela pasatuta dagoen aldatseko errebuelta baino aurreraxeago. 12:15 inguruan gertatu da ezbeharra, oraindik argitu barik dauden arrazoiengatik. Istripua eduki duten autoak Ford Fiesta, Fiat Scudo, Mazda 6, Renault Megane eta Seat Ibiza markakoak izan dira. Kolpearen ondorioz, autoak errepidearen zabalean banatuta gelditu dira. Zaurituetatik sei anbulantzian eroan dituzte Galdakaoko ospitalera, eta bat helikopteroz, larritasun maila ezberdinekin. 11 urtetik 46 urtera artekoak direla eman du jakitera Ertzaintzak. Istripuaren eraginez, BI-633 errepidean auto ilara luzeak sortudira eta bidea moztu behar izan zuten ertzainek. Ez dute guztiz zabaldu 15:00ak pasatxora arte.

Ez du erantzunik

2009-06-10 | 16:24:51

Jose Ramon Foruria 'Foru' Basaurira mugitu dute osasun azterketa egiteko

Galdakaoko ospitalean egingo dizkiote azterketak baina noiz izango diren ez dakite oraindik.

Markina-Xemeingo Amnistiaren Aldeko Mugimenduak jakitera eman duenez, Jose Ramon Foruria  euskal preso politikoa Basauriko kartzelara ekarri dute Galdakaoko ospitalean osasun azterketa bat egiteko. Markinarrari, 92. artikulua eta etxean zigorra betetzeko eskaria ukatu egin zioten, baina oraingoan, bertako medikuek osasun azterketa bat egitea onartu diote, oraindik noiz izango den ez badaki ere.

Erantzun 1

2009-06-08 | 18:34:48

Eskola Kirola jai bihurtuko da aste honetan

Ikasturteari amaiera emateko hainbat erakustaldi egingo dituzte ekintzetan parte hartu duten ume eta gazteek.

Orain dela hiru urte bat egin zuten Markina-Xemeingo eskola biek ¬Bekobenta eta Bera Kruz Ikastola¬ eta Etxebarriko Manuela Zubizarretak, eta guztiak batera Eskola Kirola antolatzen hasi ziren. Ordutik, urte amaieran jaia egiten dute ikasturteari amaiera emateko, eta aurten eguenetik hasi eta domekara arteko egitarau zabala prestatu dute.

Ez du erantzunik